Emile Souvestre (elparolu Emil Suvestr) naskiĝis en Morlaix kaj mortis en Parizo. Kelkaj artikoloj, publikigitaj en revuoj, konigis lian nomon, kiam li estis oficisto en librejo, kaj nomigis lin lernejestro, ofico kiun li baldaŭ forlasis por fariĝi direktoro de ĵurnalo Le Finistère. Sed pro politikaj aferoj, li eksiĝis, kaj alvenis Parizon dum la jaro 1835. Liaj unuaj romanoj pri Bretonujo multe sukcesis, ĉar li klopodis por elvidigi la bretonajn morojn kaj kutimojn en priskriboj plenaj je vereco, natureco kaj freŝeco. Lia stilo estas koloroplena, kaj lia imago ankaŭ tute vigla.

La tre interesa novelo, kiun ni ekpublikigas hodiaŭ, estas eltirita el rakontaro titolita Sous les ombrages (Sub la ombraĵoj). Ĝi apartenas, pro sia formo, al la romantika epoko, sed, kvankam ĝia heroino portas historian nomon, ĝi estas absolute imagita, kaj la Bianca Capello, pri kiu li parolas, havas nenion komunan kun la Dukino de Toskanio, amatino de Francisko de Médicis, kun kiu ŝi edziniĝis dum la jaro 1579.

Emile Souvestre reprezentigis ankaŭ en diversaj parizaj teatroj multnombrajn teatraĵojn, kiuj fame konigis lian nomon iomete forgesita de nia epoko ; kaj France-Esperanto estas feliĉa rememorigi tiun talentoplenan literaturiston al niaj francaj kaj alilandaj legantoj.