Supren-flugi volus mi kun alaŭdeto,
Flirti en aero kiel hirundeto,
Naĝi kun fiŝeto en torento klara
Al vi, Janko kara !

Ĉar mi nek fiŝeto sur Vistula fundo,
Nek mi alaŭdeto estas, nek hirundo,
Nur al mi kantetas vento la montara :
Venos Janko kara !

*

Se mi super fonto, kiel stel’ radia,
Min speguli povus en animo via ;
Kiel vaga lumo, kiu flamas pale,
Se al vi ekbrilus mia larm’ kristale !

Ĉar mi nek steleto en la font’ brilanta,
Nek mi estas kampa lumo la vaganta,
Fluas do sur roso mia plend’ sen fino ;
Ve al vi, knabino !

A. Grabowski.

Kiel rompita vente arbeto
Estas animo la mia.
Kie vi estas roza kroneto,
Kie vi floro lilia ?

Ĉion forprenis Janko-Karulo,
Kion fordoni mi povis ;
Ĉie lin serĉas mia okulo,
Sed lin nenie retrovis.

Kie vi estas, falko aera,
Kie vi mia brilanta suno ?
Mi kiel kampa flor’ en aŭtuno
Sen vi pereas mizera.

A. Grabowski.